Falece aos 91 anos o empresario lucense Manuel Núñez Aldegunde
É o fundador, xunto á súa dona, do grupo Torre de Núñez, especializado na elaboración de produtos cárnicos
O empresario lucense Manuel Núñez Aldegunde faleceu aos 91 anos. É coñecido por fundar hai 60 anos, xunto á súa dona, Asunción Torre, o grupo Torre de Núñez, especializado na elaboración de produtos cárnicos.
O grupo despediu o seu fundador a través dunha publicación nas redes sociais, onde este sábado comunicou o falecemento "tras unha vida dedicada á familia, ao traballo ben feito e ao compromiso coa súa terra".
"O que naceu como un pequeno obradoiro se converteu, grazas á súa visión e esforzo, nun referente do sector cárnico galego, nacional e internacional", valora o equipo da empresa.
O texto lembra que "a súa visión" tamén lle levou a outros proxectos empresariais, como o Hotel Torre de Núñez.
"O seu legado transcende o empresarial. Foi un home que creu nas persoas, na honestidade e no orgullo de facer as cousas ben", subliñan.
