Iberia, Renfe e Iberdrola reclaman medidas polo caso Rubiales pero non cancelan o patrocinio
Iberdrola é o principal patrocinador da selección nacional de fútbol feminino
Iberia converteuse no primeiro patrocinador da Real Federación Española de Fútbol (RFEF) en pronunciarse publicamente sobre o caso Rubiales e pediu "medidas para preservar a dignidade" das futbolistas.
"Cando se producen situacións ofensivas, impropias dunha sociedade desenvolvida, moderna e igualitaria como a española, Iberia apoia as medidas oportunas e pertinentes que haxa que tomar para preservar os dereitos e a dignidade das e os deportistas", defendeu este venres a través dunha mensaxe na súa conta da rede social X (antes Twitter).
Iberia siempre ha apoyado y va a seguir apoyando al talento, al deporte y al fútbol español, que es nuestro papel como patrocinadores, entre otros, de la @RFEF. En todo caso, cuando se producen situaciones ofensivas, impropias de una sociedad desarrollada, moderna e igualitaria…
— Iberia (@Iberia) August 25, 2023
Iberdrola, máximo patrocinador, tamén se pronuncia
Iberdrola pronunciábase horas máis tarde recalcando tamén "a defensa da igualdade dos dereitos e a dignidade das mulleres", e nese sentido aseguraron que "calquera actitude que se desvíe ou vaia en contra destes valores non ten cabida no mundo do deporte nin na sociedade actual"
O patrocinador da Selección Feminina de Fútbol lamenta que se abafe o triunfo da Selección e queren "continuar á beira das mulleres deportistas para derrubar obstáculos xunto a elas, para facilitar as súas metas e alcanzar grandes obxectivos".
Consideran as xogadoras "referentes sociais que lembran ás nosas nenas que practican deporte que os límites dos seus soños só dependerán das súas propias capacidades e esforzo".
Porén, ningunha das dúas compañías cancelou o patrocinio á Real Federación Española de Fútbol.
Os usuarios de X responderon en masa a Iberia criticando que apoie as xogadoras sen retirar o patrocinio. A maioría deles pídenlle á compañía que deixe de achegar diñeiro como anunciante ata que Luis Rubiales sexa cesado.
En relación ao seu patrocinio, Iberia sinalou en redes sociais que "vai seguir apoiando o talento, o deporte e o fútbol español".
Outros patrocinadores da Federación, como Renfe, sinalan que "é o momento do Consello Superior de Deportes (CSD) e a súa actuación, que apoiamos de forma rotunda".
