Excelentes previsións para a fin de semana grande do San Froilán
Agárdase un cheo total tanto na hostalería coma no recinto feiral
O prognóstico do tempo dá máximas duns 30 graos na capital luguesa
A festa non para en Lugo. Se onte se celebraba o propio día de San Froilán, as patronais continúan dende hoxe con toda a fin de semana grande por diante.
Agárdase, ademais, un tempo seco e solleiro, cuns 30 graos a primeira hora da tarde e uns 20 contra a medianoite. As previsións para a hostalería, xa que logo, non poden ser mellores.
"As festas do San Froilán sempre son magníficas. Pero son sublimes, apoteósicas, se o tempo acompaña, como vai ser este ano", di Cheché Real, presidente da Asociación de Hostaleiros de Lugo.
"Esta é unha fin de semana moi forte para toda a hostalería lucense. Para hoxe á noite, e para mañá e pasado ao mediodía, completos de reservas", asegura Francisco López, hostaleiro.
"O sábado estamos ao cento por cento. Para hoxe quedan agora mesmo dez habitacións por vender, que seguramente se vendan ao longo da tarde porque o bo tempo axuda moito a que axente se anime a quedar", conta Ana Gómez, directora de hotel.
Pero non só se espera unha ocupación plena nos hoteis e nos restaurantes da cidade. Tamén nos preto de 200 negocios instalados no recinto feiral, entre os que destacan as tradicionais casetas do polbo.
"A verdade é que o teléfono non para de soar. Nós para mañá e pasado non podemos facer máis reservas. Sempre queda a posibilidade de que na cola se poida comer, mais eu recomendo que a xente veña ben cedo", advirte Ramiro López, hostaleiro.
"A fin de semana pasada foi un engadido porque xa había moitos anos que non montabamos, pero agora vén a fin de semana grande, en que se prevé moi bo tempo. Esperemos que veña moita xente", agarda Carmen Fariña, dona dunha barraca.
A este cheo total contribúe un programa con preto de 200 actividades, moitas delas previstas para esta fin de semana. Entre elas destacan as do Domingo das Mozas, como o concerto de Baiuca que encabeza o cartel.
É tal o éxito este ano, que de feito estase a estudar prolongar as festas outra fin de semana máis.
Desfile de traxes tradicionais no Domingo das Mozas
