Evita 18 anos de condea por violación porque os xuíces non ven probas de intimidación

A Audiencia Provincial de Lugo condenou un home a un ano de cárcere por un delito de maltrato de obra no ámbito da violencia de xénero por coller do brazo a denunciante e golpeala cando eran parella sentimental, pero exímeo dos cargos de violación polos que se lle pedían 18 anos.

A sentenza considera probado que ambos mantiñan no momento dos feitos unha relación sentimental de convivencia e que nunha ocasión el agarrouna polo brazo, arrastrouna polas escaleiras e golpeouna dándolle labazadas no costado.

A denunciante, que declarou tras un biombo no xuízo celebrado en maio, asegurou que o acusado a obrigaba a manter relacións sexuais sen protección e que exercía presión verbal cando ela se negaba, engadindo que "se poñía violento".

Os maxistrados indican que, do resto das probas practicadas, "tampouco se extraen elementos que, cun mínimo rigor, avalen o relato da denunciante, en canto a que se vise forzada polo acusado a manter relacións sexuais, empregando a forza ou intimidándoa dalgún modo".

Pola súa banda, o acusado negara os feitos durante o xuízo asegurando que un dos episodios se produciu cando a muller chegou ao domicilio baixo os efectos do alcol e que as lesións foron porque caeu diante da porta.

Ademais do ano de prisión, a sala impónlle a privación do dereito á tenza e porte de armas durante tres anos e a prohibición de achegarse á vítima e de comunicarse con ela por calquera medio durante tres anos. En concepto de responsabilidade civil, deberá indemnizar a afectada con 600 euros, unha cantidade moi inferior aos 50.000 euros que solicitaba a acusación particular e aos 30.000 da Fiscalía.

A sentenza non é firme, pois cabe presentar recurso ante o TSXG.