Evacúan un home en helicóptero tras sufrir un incendio na súa casa da Guarda
Os equipos de emerxencias atopárono cuberto cuns colchóns no medio da casa
As lapas danaron a cociña, a porta da entrada e diferentes bens da casa
Aconteceu no lugar do Castro, na Guarda, pouco antes das dúas e media da tarde. Daquela, varios veciños viron que nunha casa se estaba a producir un incendio e, sen perder un intre, alertaron o 112.
"Ao chegar atopámonos cun incendio na entrada da vivenda, sufocámolo e rastrexamos dentro da casa", explica Anselmo Pequeño, capataz do GES da Guarda.
Porque a veciñanza, ao dar o aviso, alertaba tamén de que no interior da casa podía haber xente.
"Había un señor, o dono, que estaba cuberto cuns sofás. Sacámolo e levouno o 061, e despois un helicóptero trasladouno ao hospital de Vigo. E despois rematamos de extinguir o lume", engade Pequeño.
As lapas afectaron principalmente á cociña, que está no segundo andar. "Arderon varios enseres e algo da cociña", explican.
A rápida intervención dos bombeiros evitou que o lume se espallase ao resto do inmoble.
