Evacuada unha nena na illa de Ons por unha urxencia médica

Unha nena de dous anos tivo que ser evacuada de urxencia da illa de Ons, segundo informa o Parque Nacional Marítimo-Terrestre das Illas Atlánticas de Galicia.

A menor presentaba síntomas dunha hipoglucemia severa, o que requiriu unha intervención rápida e coordinada. O persoal e o servizo sanitario do Parque Nacional realizaron a primeira valoración clínica e a estabilización inicial da menor. Ao confirmarse a gravidade do cadro, activouse o protocolo establecido de coordinación co 061, que determinou a necesidade dun traslado aéreo inmediato.

Un helicóptero de emerxencias evacuouna de xeito urxente ao hospital para que puidese recibir atención especializada.