As primeiras conclusións sobre as causas do accidente do funicular de Lisboa publicaranse esta tarde

Os operarios e as máquinas xa sacaron da rúa lisboeta da Glória os restos do funicular accidentado o mércores. Tamén retiraron do sitio a outra cabina, que permanecía en perfecto estado preto do lugar do sinistro. 
Moitas persoas achéganse á zona para deixar mostras de dó ás dezaseis vítimas mortais e de apoio aos máis de vinte feridos no accidente.

A empresa Carrís, que xestiona os catro elevadores similares, é a responsable de seguridade dos aparellos

Segundo publica este sábado o xornal portugués Público, os ascensores históricos da Glória e Lavra nunca foran inspeccionados pola Autoridade Nacional de Seguridade Ferroviaria, xa que, segundo a lexislación aprobada en 2020, non teñen competencias sobre estes aparellos, construídos antes de 1986 e clasificados oficialmente como patrimonio. De feito, o ascensor da Glória, o sinistrado, foi declarado monumento nacional en 2002. A empresa Carrís, que xestiona os catro elevadores similares que hai en Lisboa, é responsable da seguridade dos aparellos, aínda que unha directiva da Unión Europea di que é responsabilidade exclusiva da autoridade de Seguridade Ferroviaria garantir o cumprimento da normativa.

Esta tarde coñeceranse as primeiras conclusións sobre as causas do accidente

A Oficina de Prevención e Investigación de Accidentes Aéreos e Ferroviarios en Portugal anunciou que esta tarde publicará unha nota informativa sobre as primeiras conclusións acerca das causas do accidente do famoso funicular da Glória.