Especialistas recomendan o consumo de pezas enteiras de froita fronte á que se vende cortada
A froita cortada ten máis posibilidades de traer bacterias porque lle falta a pel que a protexe
Melón, piña, sandía, mango... Hai variedade de froita que hoxe en día, e máis na temporada de verán, se pode atopar xa cortada nos establecementos de venda.
"Os establecementos que venden esta froita teñen unha normativa que é que se esa froita está cortada non debe estar a máis de 25º, ten que estar por debaixo desa temperatura, e non máis de tres horas. E se se amplían esas tres horas ten que estar no frigorífico e por debaixo dos 4º".
En todo caso, especialistas como o médico do hospital San Rafael da Coruña Manuel Viso alertan dos posibles riscos en caso de optar por esta modalidade de consumo.
Engade: "Non sabemos cando nos cortan esa froita, como estaba o coitelo, en que se acaba de empregar, ata onde se cortou a froita que se cortou aí previamente, e todo iso pode estar contaminado e transmitir bacterias á froita, sobre todo, ecoli, listeria ou salmonella".
Aconsellan, polo tanto, mercar as pezas de froita enteiras.
Sinala o doutor Viso: "Os médicos non estamos de acordo en que se merque froita cortada. Hai que mercala enteira. A froita para iso ten a pel, que é o que a protexe".
Consumir froita é saudable sempre que se faga de xeito correcto.
