Escribano vende o 14,3% da tecnolóxica Indra, da que era segundo máximo accionista

A empresa Escribano Mechanical & Engineering (EM&E) vendeu o 14,3% que tiña na tecnolóxica Indra, confirmaron a EFE fontes do mercado, tras a noticia adiantada pola diario Expansión, que asegura que formalizou esta saída a través dunha colocación acelerada. A súa participación está valorada en máis de 1.300 millóns de euros.

A compañía especializada en Defensa despréndese así do paquete completo que mantiña na multinacional tecnolóxica, da que era segundo máximo accionista, e da que Ángel Escribano, un dos dous propietarios de EM&E, era presidente ata o pasado 1 de abril.

Ángel Escribano dimitiu como presidente de Indra tras renunciar á operación que se estaba negociando entre esta empresa e EM&E e despois de que a Sociedade Estatal de Participacións Industriais (SEPI), máximo accionista, lles reclamase emendar o conflito de interese que existía no proceso.

Co peche do prezo das accións este martes en 52,34 €, a valoración dos 25,26 millóns de accións é de aproximadamente 1.322 millóns de €, pendente de confirmación do importe real da transacción.

Javier Escribano dimite

Esta transacción supón a perda de EM&E do seu representante no consello de administración da empresa tecnolóxica española, un cargo que ocupaba Javier Escribano, quen dimitiu este martes do Consello de Administración, onde exercía como conselleiro dominical.

A familia Escribano posuía o 14,3 % de Indra, mentres que SEPI é o maior accionista con case o 30 %. O terceiro maior accionista é o fondo Amber, fundado por Joseph Oughourlian –presidente de Prisa– e Sapa Placencia é o cuarto.

Tras a dimisión de Ángel Escribano, o Consello de Administración de Indra elixiu a Ángel Simón, ex director executivo de Criteria, como presidente de Indra, mentres que José Vicente de los Mozos segue como conselleiro delegado.

O 15 de maio de 2023, EM&E adquiriu unha participación do 3 % en Indra por aproximadamente 65 millóns de euros e, o 24 de novembro dese mesmo ano, aumentou a súa participación ao 8 %, converténdose no segundo maior accionista da empresa.

Un ano despois, en maio de 2024, Javier Escribano converteuse no representante de EM&E no consello de administración de Indra, substituíndo á conselleira independente Elena García Armada. O 5 de decembro dese ano, Escribano aumentou a súa participación en Indra ao 14,3 %.

Ángel Escribano, cofundador e presidente de EM&E, foi nomeado presidente de Indra en xaneiro de 2025. En abril, a empresa comezou a explorar unha fusión con EM&E, unha operación na que a SEPI (Sociedade Estatal Holding) esixiu que se abordase un conflito de intereses, o que finalmente levou á dimisión de Escribano.