Envían a prisión o autor confeso do asasinato en Francia da menor española

Un francés de 31 anos foi encarcerado provisionalmente e imputado por secuestro, violación e asasinato da española Vanessa, de 14 anos, vista con vida por última vez o venres cando saía do instituto da localidade de Tonneins, no sur de Francia.

A decisión adoptouna un xuíz instrutor do Tribunal de Agen, onde o sospeitoso compareceu esta tarde despois de dous días baixo custodia policial, durante os que confesara os crimes. Vanessa emigrara a Tonneins coa súa familia hai só un ano.

Romain, o nome que os medios franceses fixeron público, introduciuna no seu vehículo pola forza, violouna, asasinouna e abandonou o seu corpo nunha casa en Birac-sur-Trec, preto de Tonneins.

A Fiscalía cre que o suposto asasino elixiu a vítima por azar, xa que non a coñecía de nada e decidiu abordala cando a rapaza andaba pola beirarrúa nas proximidades do instituto Germillac.

Forzouna a entrar no vehículo para violala e logo matala por estrangulamento, co obxectivo "de ocultar a propia violación", segundo a Fiscalía.

As cámaras de videovixilancia permitiron localizar rapidamente o coche e o seu dono, ao que interrogaron a mesma noite do venres. "Xa sei por que estades aquí", dixo Romain aos xendarmes cando o foron a buscar ao seu domicilio.

O sospeitoso xa fora condenado a unha curta pena de 15 días por agresión sexual en 2006, cando era menor de idade, e non figuraba nos ficheiros de depredadores sexuais.

O home, residente na localidade veciña de Marmande, acababa de ser pai dunha nena coa súa actual parella, quen á súa vez ten un neno de 5 anos dunha relación anterior que vivía con eles.
Romain, sen traballo fixo, era "moi reservado" e presuntamente tiña problemas de alcoholismo.