Entréganlle a presidencia do Consello da Unión Europea a Luis Planas
España asumirá a presidencia a partir do 1 de xullo
Celebrará unha reunión informal en xullo en Vigo centrada na descarbonización do sector pesqueiro
O ministro sueco de Asuntos Rurais Peter Kullgren entregou este martes a Presidencia do Consello da Unión Europea ao titular español de Agricultura, Pesca e Alimentación, Luis Planas.
Tras finalizar o Consello de Ministros de Agricultura e Pesca da UE, celebrado en Luxemburgo, Planas recolleu a testemuña de Suecia para presidir a UE a partir do próximo 1 de xullo.
Planas referiuse a algunhas das estratexias do Goberno español para o próximo semestre, como impulsar a autonomía estratéxica aberta no sector agroalimentario, a transición ecolóxica e a adaptación ambiental.
En materia de agricultura, as prioridades españolas centraranse en impulsar e promover as novas tecnoloxías, garantir a seguridade alimentaria, a protección da saúde e do medio ambiente, impulsar a Política Agraria Común e dar máis visibilidade ao mundo rural.
Ademais, a Presidencia española propón unha transición cara a modelos máis sostibles na pesca, reforzar o papel da Política Pesqueira Común, o recoñecemento do papel estratéxico da pesca e a acuicultura na seguridade alimentaria e o establecemento dos Totais Admisibles de Captura (TAC) plurianuais para determinadas especies.
España celebrará unha reunión informal en xullo en Vigo, centrada na descarbonización do sector pesqueiro, e outra en setembro en Córdoba sobre as novas tecnoloxías como ferramentas para unha agricultura máis resiliente fronte ao cambio climático.
