Entran en servizo as novas liñas de buses que unen Pontevedra cos concellos do rural
Os veciños de Moraña, Portas e O Campo Lameiro poden ir á cidade, de xeito totalmente gratuíto e con frecuencias de tres ou catro veces ao día
O plan +Mobe, en que colaboran a deputación e os concellos, ten financiamento da UE e busca unha mobilidade sostible e inclusiva
Un bus que conecta as aldeas coa capital do concello, desde onde poden ir á cidade, de xeito totalmente gratuíto e con frecuencias de tres ou catro veces ao día. Un servizo así é unha necesidade en moitas zonas rurais e estréase esta semana de xeito piloto en tres concellos da zona rural da provincia de Pontevedra.
Tres concellos de Pontevedra, Moraña, O Campo Lameiro e Portas, son a proba piloto do proxecto +Mobe. Que non busca só conectar o rural coa cidade, senón articular a vida das aldeas arredor do núcleo.
"De Lantaño, por exemplo, se un veciño ten que vir a Portas ao médico ou á farmacia, ou facer un papel no Concello ou ao banco, pois este mesmo autobús faille, por así dicilo, de transporte urbano", explica Ricardo Martínez, o alcalde de Portas.
Os concellos aproveitan esta semana para informar os cidadáns por carta sobre o novo servizo, que ten de momento poucos usuarios.
"Estano aproveitando non só persoas maiores, senón traballadoras ou estudantes", relata Esther Rodríguez, a condutora.
Esther vai observando o interese dos veciños. Desde Portas son catro frecuencias a Pontevedra pola mañá, de ida e de volta, desde a parroquia máis apartada do concello ata o hospital de Montecelo.
