Entra unha borrasca en Galicia con chuvias ata mediados da semana
Entra unha borrasca en Galicia con chuvias ata mediados da semana
As precipitacións estenderanse desde o oeste
As previsións indican que o furacán Danielle non se vai sentir en Galicia
O outono astronómico non comeza ata o día 23 pero o meteorolóxico xa comezou o xoves pasado. E os primeiros cambios xa se fan notar. Este domingo entra unha borrasca desde o norte que trae unha fronte fría activa, anuncia Meteogalicia.
Chegan as ansiadas chuvieiras. O día comezou con alternancia de chuvias e ceos despexados na metade leste, pero cubertos no oeste, con algo de chuvias sobre todo na costa.
Está activado un aviso amarelo por fenómenos costeiros no litoral coruñés e nas Rías Baixas. As chuvias intensificaranse cara ao final do día, pero o vento e as ondas xa se fan notar arestora. Vai ser unha semana pasada por auga. Poderían caer máis de 100 litros por metro cadrado desde hoxe ata o vindeiro domingo, segundo apuntan algúns modelos de predición meteorolóxica.
As temperaturas mínimas experimentan este domingo un ascenso moderado, mentres que as máximas manteranse sen cambios significativos.
As baixas presións marcan o comezo da semana, xa que o luns agárdase unha xornada con precipitacións máis persistentes no sur. No norte alternarán os ceos con nubes e despexados. As temperaturas seguirán en valores de verán, xa que a máxima máis baixa serán en Santiago con 21 graos e a máxima en Ourense con 26.
Todo indica que Galicia non vai percibir os efectos de Danielle, o primeiro furacán da tempada ciclónica na costa atlántica, que se mantén "case estacionario" en augas abertas do Atlántico con ventos máximos de 120 km/h. Non representa perigo para terra.
