Entra en vigor o cesamento do fogo de tres días declarado por Putin, pero rexeitado por Kíiv
Durará ata a medianoite do 10 ao 11 de maio, coincidindo co 80 aniversario da vitoria sobre a Alemaña nazi
Zelenski e o seu ministro de Exteriores, Andrí Sibiga, tacharon o cesamento do fogo de manobra propagandística e insistiron en pedir unha tregua de polo menos trinta días
O presidente ruso Vladimir Putin durante un discurso (Mikhail Metzel/Europa Press)
O cesamento do fogo de tres días en Ucraína anunciado polo presidente ruso, Vladimir Putin, entrou en vigor sen que Kíiv se sumase á iniciativa unilateral do Kremlin.
O cesamento rexerá durante as próximas 72 horas, ata a medianoite do 10 ao 11 de maio, con ocasión das celebracións polo 80 aniversario da vitoria do Exército Vermello sobre a Alemaña nazi na Segunda Guerra Mundial.
"Si, a iniciativa da parte rusa, do presidente Putin, segue en vigor", dixo Dmitri Peskov, portavoz presidencial.
O líder ruso reuniuse cos presidentes de Venezuela e Cuba; este xoves recibirá ao líder chinés e o venres fará o mesmo co presidente de Brasil e o primeiro ministro eslovaco.
Precisamente, ademais de rexeitar a tregua, o presidente de Ucraína, Volodimir Zelenski, asegurou que Kíiv non pode garantir a seguridade dos líderes que viaxen a Moscova para reunirse con Putin.
Do mesmo xeito que fixese coa breve tregua de Pascua, Putin asegurou que tomara esa decisión por motivos humanitarios e chamou a Kíiv a seguir os seus pasos.
O Kremlin condenou os ataques con drons perpetrados nos últimos días polo exército ucraíno contra obxectivos en varias rexións rusas, incluído Moscova, o que obrigou a pechar, en varias ocasións, os aeroportos e a aprazar, desviar ou cancelar centos de voos.
"O réxime de Kíiv continúa demostrando a súa esencia, a súa propensión ás accións terroristas", dixo Peskov.
O portavoz asegurou que Putin non impartiu novas ordes en relación cos ataques con drons, aínda que ao anunciar a tregua ordenou ao Exército que responda de maneira contundente a calquera provocación.
Con todo, engadiu Peskov, as Forzas Armadas rusas están a tomar todas as medidas para que os festexos da Vitoria transcorran "de maneira tranquila, estable e pacífica".
Aínda que a Casa Branca dixo nun primeiro momento que non apoiaba cesamentos provisionais, senón un cesamento das hostilidades duradeiro, o presidente estadounidense, Donald Trump, apoiou esta semana a iniciativa de Putin.
"Como saben, o presidente Putin acaba de anunciar un cesamento do fogo de tres días, o cal non parece moito, pero é moito", afirmou.
Tanto Zelenski como o seu ministro de Exteriores, Andrí Sibiga, tacharon o cesamento do fogo de tres días de manobra propagandística e insistiron en pedir unha tregua de polo menos trinta días.
O presidente ucraíno non especificou se Ucraína deixará de atacar durante as 72 horas en que Putin propón acalar os canóns. Funcionarios e políticos rusos acusan a Zelenski de ameazar os líderes dos países convidados a Moscova e de traizoar a memoria dos veteranos ucraínos que combateron contra os nazis na contenda mundial.
