En Vilagarcía cultivan e venden en conserva nabicol, un híbrido de grelo e repolo
O cruzamento xurdiu de xeito natural e logo de cultivar para o autoconsumo, algúns produtores comezaron a comercializala
O nabicol é unha verdura con sabor suave e moi boas propiedades nutricionais
O nabicol é un cultivo pouco coñecido, pero con boas propiedades nutritivas, segundo confirman os estudos desenvolvidos na Misión Biolóxica de Galicia, do CSIC.
"O nabicol é o cruzamento das dúas especies, é un híbrido entre como se dixeramos a verza e a nabiza. É un híbrido que xurdiu de forma natural e agora explótase como cultivo" Explica Pilar Soengas, Científica na Misión Biolóxica de Galicia (CSIC).
Por todas as súas propiedades, algúns produtores están a desenvolver proxectos dedicado á produción e venda de nabicol. O tempo da colleita vai desde novembro ata abril.
Apañan o nabicol a man, escollen as follas máis tenras e deixan a planta preparada para que medre ata o seguinte corte.
"É unha verdura boa, san e moi saudable para o corpo humano. A colleita agora é o tempo dela", di Benito Agra, o responsable de Conservas RB de Galicia.
Unha vez colleitado trasládase a unha empresa especializada na elaboración e comercialización de conservas vexetais.
"Van volcando as caixas, van escollendo se ten unha caracola, un becho ou algo, bótanlle auga, sacan follas vellas, se hai, que é moi difícil, limpan todo e váno metendo aí no depósito redondo. Danlle un asustado de auga quente e despois vai dentro da lata", explica Benito Agra.
Un alimento cultivado en Galicia saudable e rico ao que só lle falta un pequeno pulo para que os consumidores o coñezan e o demanden.
