Na provincia de Ourense hai máis persoas octoxenarias que menores de idade

En dúas provincias españolas, Ourense e Zamora, as persoas maiores de 80 anos superan en número ás menores de idade. Segundo os últimos datos de poboación publicados polo Instituto Nacional de Estatística (INE), Lugo está preto de chegar a esa situación.

As cifras, actualizadas ao 1 de abril de 2024, revelan que en toda España hai preto de tres millóns de persoas octoxenarias (2.964.575, o 6,1 % do total), por case 8 millóns de menores de idade (7.988.422, o 16,4 %).

En Zamora hai 20.528 persoas maiores de 80 anos por 18.400 menores de 18, un 12,4 % fronte a un 11,1 % respecto á poboación total da provincia. En Ourense son 37.012 por 35.642, un 12,2 % fronte a un 11,7 %.

No primeiro caso a diferenza é de 2.128 persoas e 1,3 puntos porcentuais a favor das persoas maiores de 80 anos e no segundo é de 1.370 e 0,5 puntos porcentuais.

Lugo está relativamente preto de unirse a estas dúas provincias, xa que nela viven 36.610 persoas de 80 ou máis anos, o 11,3 % dá súa poboación, por 39.414 de menos de 18, o 12,1 %.

A zona máis envellecida

As seis provincias con menor diferenza entra as porcentaxes de poboación maior de 80 anos e menor de 18 están no cuadrante noroeste da península: as tres mencionadas máis León (2,2 puntos porcentuais), Salamanca (3 puntos) e Asturias (4,1).

Así mesmo, entre as 25 onde esa diferenza é menor (máis envellecemento relativo) figuran todas as provincias de Aragón, Castela e León e Galicia, ademais de Asturias e Cantabria.

Entre as 25 onde é maior (menos envellecemento relativo) están todas as de Cataluña, a Comunidade Valenciana, Baleares, Madrid, Murcia, Navarra, A Rioxa e as cidades autónomas de Ceuta e Melilla.