En maio empezará un estudo de cribado xenético para detectar enfermidades en bebés

A proba do talón que se lles fai os bebés ao nacer permite detectar enfermidades a tempo e tratalas nos primeiros días de vida ou no primeiro mes. En Galicia, este cribado neonatal é o máis completo do Estado e o segundo mellor de Europa. Só o superan en Italia e nos Estados Unidos.

"Sobre todo por marcadores bioquímicos, aínda que xa temos dúas enfermidades por marcadores xenéticos, detectamos 34 enfermidades. Pero xa temos aprobadas outras tres. Iso como obxectivo primario porque no diagnostico diferencial vemos 14 máis. A enfermidade que máis se detecta é o hipotiroidismo conxénito, pero as que máis se detectan polo cribado son sobre todo enfermidades metabólicas hereditarias", explicou María Cruz Couce, doutura da Unidade de Emerxencias Metabólicas Conxénitas do CHUS.

Por cada 739 nenos detectan unha patoloxía.  O seguinte paso é desenvolver marcadores xenéticos, sobre os que xa se está investigando en Europa e nos Estados Unidos.

"E nós tamén empezamos agora no mes de maio cun estudo piloto para cribado xenético. E por aí pódense detectar ata 300 enfermidades en nenos", engadiu Couce.

En catro anos, Galicia tamén aspira a estar á cabeza no cribado xenético.