En liberdade os cinco detidos na última operación antidroga na Arousa
Quedan investigados por un delito contra a saúde pública
Os cinco foron arrestados na operación Platón deste martes
A maxistrada do Xulgado de Instrución número 1 de Vilagarcía decretou a posta en liberdade dos cinco detidos no operativo contra o tráfico de drogas desenvolto este martes por axentes da Policía Nacional na comarca de Arousa.
Segundo informaron fontes do Tribunal Superior de Xustiza de Galicia (TSXG), todos eles están investigados por un delito contra a saúde pública. Así mesmo, a maxistrada impuxo a dous dos arrestados a retirada de pasaporte, a prohibición de saída do territorio nacional, así como a comparecencia os días 1 e 15 de cada mes.
O operativo, levado a cabo polo grupo número dous da Udyco da Comisaría de Pontevedra, desenvolveuse durante a xornada deste martes na comarca de Arousa e practicáronse seis rexistros, varios deles no municipio de Vilagarcía. Os axentes interviñeron cocaína, pequenas cantidades de diñeiro e útiles relacionados co manexo da droga.
