En liberdade o garda civil que fuxiu dun control no que morreu un policía de Monforte

A xuíza do Tribunal de Primeira Instancia de Monforte de Lemos (Lugo) decretou a posta en liberdade do axente da Garda Civil que conducía o coche ao que perseguiron dous policías locais que tiveron un accidente mortal na madrugada deste sábado.

O vehículo policial sufriu unha saída de vía e morreu un dos axentes, Eusebio Cuesta, de 33 anos. O seu compañeiro foi ingresado no hospital, pero a súa vida non corre perigo.

Como medida cautelar, a xuíza impúxolle ao acusado a retirada do carné de conducir despois de que o detido se acollera ao seu dereito a non declarar. O home está a ser investigado por negarse a someterse ás probas de alcoholemia e por desobediencia, aínda que non se descarta que os delitos "poidan variar ao longo da instrución".

Unha persecución que rematou en traxedia

Segundo o informe policial, no momento do sinistro a patrulla da quenda de noite do venres 22 de agosto estaba realizando un control de documentación na rúa Leopoldo Calvo Sotelo. Alí, observaron un vehículo que circulaba de xeito anómalo, polo que lle ordenaron o alto.

Tras detectar que o condutor presentaba síntomas de estar conducindo baixo os efectos do alcol, pedíronlle que se sometera a unha proba de detección alcohólica.

Nese intre, o condutor increpounos e abandonou o lugar a toda velocidade. Os axentes perseguírono pero sufriron unha saída de vía á altura da igrexa de Ribas Altas. Como consecuencia do impacto, o policía que conducía faleceu no acto. O outro, Francisco Cao de Jesús, permanece ingresado no Hospital Comarcal.

O Concello decretou tres días de loito oficial en sinal de dó.