Os médicos convocan outros catro días de folga polo borrador do Estatuto Marco

Os sindicatos médicos CESM e SMA convocaron para o próximo 15 de novembro unha nova manifestación en Madrid e novas xornadas de folga seguidas os días 9, 10, 11 e 12 de decembro para protestar pola reforma do borrador do Estatuto Marco, que regula as condicións laborais do persoal sanitario.

Así o manifestaron este xoves estes sindicatos a través dun comunicado conxunto, e ademais, os seus representantes acudiron a un acto en que participou a ministra de Sanidade, Mónica García, para entregarlle unha carta en que reclaman unha nova reunión que "permita avanzar nunha posible solución consensuada ao conflito ante os escasos avances dos últimos meses".

Os sindicatos médicos levan anos esixindo ao Ministerio de Sanidade que elabore un estatuto propio do persoal médico e facultativo distinto do resto de profesionais do Sistema Nacional de Saúde, así como unha clasificación profesional adecuada e unha regulación da xornada laboral, entre outras demandas.

Mónica García: "Non se lle poden pedir cousas que non sexan da súa competencia"

Este xoves, Mónica García afirmou que o Estatuto Marco no que puxo "todo o agarimo" e diálogo posibles introduce "melloras palpables" para os profesionais sanitarios, pero insistiu en que a esta lei "non se lle poden pedir cousas que non sexan da súa competencia".

García salientou que estes dous anos á fronte de Sanidade merecéronlle " a pena con todos os desgustos que poida ter a política" por "tentar transformar medidas" como con esta lei "complexa e esquecida", pero que servirá, entre outras moitas cousas, para reducir as xornadas laborais e as gardas, considerar aos sanitarios como autoridade pública ante as agresións, a desconexión dixital ou a exención de quendas nocturnas a partir dos 55 anos, entre outras moitas.

"Quedan cousas, claro que quedan cousas, porque da mesma maneira que nós non lle pedimos ao anestesista que opere, ao Estatuto Marco e algunhas leis non se lles pode pedir cousas que non son da súa competencia e que non son cousas que sexan do seu amparo", apuntou en referencia a que algunhas das reivindicacións dos médicos exceden as competencias do Ministerio de Sanidade.

No comunicado dos sindicatos, lémbrase que as novas xornadas de folga veñen precedidas dos paros que tiveron lugar os pasados 13 de xuño e 13 de outubro, que agora se repetirán durante catro días -9, 10, 11 e 12 de decembro-.

Pola súa banda, a manifestación en Madrid o día 15 de novembro comezará -como noutras ocasións- no Congreso dos Deputados e finalizará fronte ao Ministerio de Sanidade.

Aínda así, tanto o CESM como o SMA aseguraron que manteñen a súa "disposición" para abordar as demandas do colectivo médico na mesa de negociación de Sanidade, xa que consideran que "a gravidade do momento esixe altura política e compromiso firme".