Emma Cuervo e Teresa Herrera, as probas definitivas do Deportivo antes de iniciar a Liga
Os dous partidos, contra Real Oviedo -mércores- e Le Havre -sábado-, poderán verse na Televisión de Galicia
O Deportivo encara a parte final da pretemporada con dúas probas de alto nivel. O mércores enfrontarase ao Real Oviedo nunha nova edición do Emma Cuervo, un dos clásicos do verán (19:00 horas). O sábado fará o derradeiro ensaio e presentarase diante da súa afección contra o Le Havre francés no Teresa Herrera (21:00 horas). Os dous partidos poderán verse pola Televisión de Galicia e Agalega.gal en directo.
O equipo de Antonio Hidalgo xa está en Galicia despois de remataren a xira polo Reino Unido con dous amigables contra o Watford (derrota por 1-0) e diante do Middlesbrough (2-2). Neses encontros estreáronse Quagliata, Gragera e Loureiro, as tres últimas fichaxes do conxunto coruñés.
Os seareiros poderán ver as evolucións do seu equipo o sábado contra o equipo bretón do norte de Francia, o Le Havre. O Deportivo ten uns 25.000 abonados que poñen moitas esperanzas nesta campaña logo do ascenso de hai dúas temporadas e da permanencia acadada na que acaba de rematar. A continuidade de xogadores como Yeremay ou Mella malia as ofertas superiores no económico doutros equipos e as novas fichaxes tinguen de ilusión a un equipo que buscará estar na zona alta da Segunda División.
