Dous mortos e un ferido tras un tiroteo nun bar de Sevilla

Dúas persoas morreron e outra queou ferida na tarde deste sábado nun tiroteo rexistrado nun bar da urbanización Os Netos do municipio de Carmona, en Sevilla.

Segundo informou o Servizo de Emerxencias 112 de Andalucía, ao redor das 16:45 horas recibiron varios avisos por un tiroteo na rúa Azahar da urbanización.

As testemuñas indicaban que unha persoa "sacara un rifle e disparara contra un bar" e que había dúas ou tres persoas no chan.

Desde o 112 deuse aviso a Emerxencias Sanitarias 061 e á Garda Civil, que iniciou unha investigación para esclarecer o sucedido.

Como consecuencia do tiroteo, dúas persoas morreron e polo menos outra quedou ferida, sen que polo momento se coñezan as súas identidades, informa a axencia EFE.

Segundo testemuños dos veciños recolleitos por EFE, foron dúas as persoas que chegaron con escopetas ao bar de José, situado nunha urbanización nunha zona rural entre Carmona e o aeroporto de Sevilla.

Unha das persoas que estaban no bar interpúxose no seu camiño e recibiu un disparo que acabou coa súa vida, mentres o outro morto é o dono do bar, segundo sinalaron os veciños.

Ao parecer, os presuntos autores dos disparos, que fuxirían cara a Sevilla, son coñecidos nesa urbanización, onde teñen unha casa, aínda que ao parecer vivían no polígono de San Pablo da capital sevillana. 

Os veciños din que o presunto asasino extorsionaba ao dono do bar

Cando chegaron os servizos de Emerxencias e a Garda Civil atoparon fóra do bar o corpo doutro home, tiroteado tamén, pero que estaba vivo, polo que foi trasladado en helicóptero ao hospital, onde ingresou en estado grave.
Aínda que non transcendeu nada da investigación aberta pola Policía Xudicial da Garda Civil de Sevilla, o sospeitoso está identificado.

Veciños da zonas dixeron, de xeito anónimo, que o presunto asasino pertence a unha familia conflitiva da zona, que extorsionaba os negocios do lugar. O hosteleiro falecido negouse a darlle máis cartos. A resposta foi matalo a tiros.