Dous mortos e 16 feridos nun accidente de autobús no leste de Francia

Dúas persoas morreron, unha delas menor de idade, e outras 16 persoas quedaron feridas nun accidente de autobús rexistrado no leste de Francia. O sinistro produciuse contra as 07:00 da mañá cando o autobús se saíu da vía e chocou contra unha árbore nunha cuneta. O vehículo circulaba entre Lión e Bourg-en-Bresse con 43 persoas a bordo, entre elas 15 menores.

Dous dos ocupantes faleceron. Un era menor de idade; o outro acababa de cumprir os 18 anos. Hai ademais 16 feridos, tres deles en estado grave. Entre os feridos figura o condutor, que aínda non puido ser interrogado, e permanece hospitalizado.

O ministro francés de Educación expresou a súa solidariedade cos alumnos afectados polo accidente dun autobús e trasladou o seu apoio ás familias.

"Quero ter un pensamento para estes alumnos e as súas familias. Cando os nosos alumnos, os nosos nenos, son vítimas de accidentes desta natureza, sempre é unha proba moi difícil", declarou o ministro.

As autoridades activaron o centro operativo departamental para coordinar a intervención dos distintos servizos de emerxencia e organismos implicados na xestión da crise. Mobilizáronse 102 bombeiros, 58 vehículos e 50 xendarmes. Tamén se despregaron catro helicópteros e oito equipos do SMUR (servizo móbil de emerxencias e reanimación).

A prefectura pediu á poboación que evitase a zona mentres se habilitaban desvíos de tráfico.