Arranca a tempada do chocolate con churros, un doce que mantén viva unha antiga tradición
O churro ten a súa orixe nos antigos pastores nómades da Península Ibérica
O chocolate con churros é un doce sinxelo pero que mantén viva unha antiga tradición e sostén a economía de moita xente. O churro ten a súa orixe nunha receita creada polos antigos pastores nómades que habitaban a Península Ibérica, a cal mantívose ao longo dos séculos. Esta está baseada en tres ingredientes principais: a fariña, a auga e o sal. A partir destes, o segredo está na calidade da fariña, a cal é a encargada de darlle o sabor, e na fritura, para lograr o efecto crocante.
Coa chegada do frío, as churrerías, tanto fixas como ambulantes, dan inicio a súa tempada alta. Porén, segundo afirma o churreiro Cándido Martínez, "cada vez o verán esténdese máis e o inverno é máis reducido", prexudicando a este tipo de establecementos. A economía destes negocios está sostida grazas a esta sobremesa, como é o caso da churrería de Cándido, na cal supón entre un 75 e un 80 por cento da facturación.
Este doce tamén ten unha ampla presenza nos postos ambulantes, os cales non só están presentes en festas e romarías, senón que instálanse nos parques e nas prazas cando comeza o outono. Un exemplo destes é a churrería ambulante na que traballa David Seara, na que pesar da estacionalidade que caracteriza esa sobremesa, xa son varias as xeracións da familia que levan vivindo deste negocio.
