Dous feridos leves no atraco dunha cafetería en Vigo

Dúas persoas foron feridas cando intentaban reducir a atracadora dunha cafetería en Vigo. 

Os feitos aconteceron este martes á tardiña, cando unha muller, supostamente armada cun coitelo, irrompeu no establecemento e esixiu a recadación da caixa.

Dous clientes do local, situado nas proximidades da estación de tren de Guixar, intentaron reducila e, no forcexo, foron feridos leves, con cortes nun dedo e nun brazo, respectivamente.

Finalmente, conseguiron controlar a muller, de 23 anos, ata que chegou a Policía Local e a levou arrestada como presunta autora de delitos de roubo con violencia e intimidación e lesións.