Dous detidos por agredir un home na súa casa en Santiago tras roubar nun supermercado

Ten o ollo rebentado. E tocoulle a el como lle puido tocar a outro. Todo empezou na rúa, cando tropezaron coa súa muller. 

"Nun momento en que non había ninguén na rúa, dous rapaces non moi maiores baixaban pola costa e a miña veciña, que saía da casa, increpárona e metéronse con ela e non sei se ela lles contestou", conta a veciña nun relato confirmado pola propia vítima.

A muller colleu medo e meteuse de volta na casa, pero os agresores buscaban lea. 

"Eran dous borrachos que ían mosqueados polas súas propias cousas e déronlle un golpe ao cristal da porta e partíronllo", engade outra muller que pasou por alí.

"Eles foron detrás, rompéronlle os cristais da porta, e ela tiña a familia dentro e no forcexo, déronlle coa man no ollo, que o ten súper inchado", coincide a veciña.

Malia o impacto, conseguiron gravalos cando marchaban rúa abaixo, e sorte diso. Grazas ás imaxes, a Policía Local detívoos ás poucas horas, preto dun supermercado no que tamén a learon.  

"Entraron dous rapaces maiorciños, entre trinta e corenta anos. Un tentou roubar e caeulle a mercadoría toda. Unha empregada díxolle que saíra, que os estaban gravando as cámaras e o outro púxose violento. Como a rapaza é baixiña, empezou a dicirlle que saíra para fóra, que lle ía romper a cara. Ela botounos pero eran moi agresivos. Cando saíu o outro, a compañeira quixo sacarlle das mans o que levaban e empurrouna", explica unha clienta.

Foi peor o medo que provocaron que o que conseguiron roubar.

"Non chegaron a ir atrás que é onde están as bebidas porque xa a rapaza os mandou marchar. O que levaron é da zona da entrada, comida, galletas e así. Foi unha situación moi violenta, verbalmente sobre todo", engade a muller.

Non son do barrio pero cren coñecelos das redes. Polo menos un deles. Pensan que é o mesmo que nos últimos días fora denunciado por increpar, acosar e seguir a mozas polo campus, Un vídeo que se fixo viral.