Dominik Mavra continuará como o temoneiro do Breogán por terceira tempada
O croata súmase ás renovacións de Francis Alonso, Aranitovic e Andric
Xa entrou na historia do club celeste ao colocarse como segundo máximo asistente histórico do Breogán na elite
Foto Breogán
O base internacional croata continuará como director de xogo celeste na tempada 2026/2027 na Liga Endesa
Dominik Mavra (Zadar, 1994) cumprirá a súa terceira tempada no Río Breogán. Chegou a Lugo en novembro de 2024 e desde o primeiro momento converteuse nun xogador fundamental no club, encargado de transmitir ao equipo na pista a idea de xogo proposta por Luis Casimiro.
Na presente tempada, Mavra promedia 8,8 puntos (53 % en T2, 32 % en T3, 76 % en TL) e 5,3 asistencias en case 19 minutos de media sobre a pista, o que o converte no terceiro máximo asistente da competición.
O coata xa entrou na historia do club celeste ao colocarse como segundo máximo asistente histórico do Breogán na elite.
O seu rendemento lévao a ser un dos líderes do equipo e outro dos xogadores predilectos da afección do Pazo dos Deportes.
Coa renovación de Dominik Mavra, o Río Breogán dá un paso máis na súa intención de consolidar a continuidade para a tempada 26/27 dunha base importante de xogadores do actual plantel, o cal tan boa tempada está a realizar, sumándose ás renovacións de Francis Alonso, Aranitovic e Andric.
