Dimiten dous membros do Goberno británico antes das vindeiras eleccións xerais
Dimiten dous membros do Goberno británico antes das vindeiras eleccións xerais
Estas dúas renuncias súmanse a outra sesentena de deputados da formación gobernante que non concorrerán nos próximos comicios
Esta desbandada prodúcese nun momento en que o Partido Conservador cae nas enquisas
Segundo unha media das sondaxes dos últimos dez días, os laboristas gañarían cun 43,9 % do voto
![O primeiro ministro británico, Rishi Sunak, nunha vistita a Cumbria. Danny Lawson/Pool via REUTERS](https://img-g24-crtvg.flumotion.com/prog24/2024/20240326/sunak_DannyLawson_REUTERS_26_marzo_2024.png)
Dous membros do Goberno conservador do primeiro ministro británico, Rishi Sunak, dimitiron este martes dos seus cargos como paso previo a deixar tamén os seus escanos parlamentarios nas eleccións xerais previstas na segunda metade do ano.
Trátase do secretario de Estado de educación superior, Robert Halfon, e do seu homólogo das Forzas Armadas, James Heappey.
Os dous comprometéronse a seguir apoiando ao Executivo ata o fin da lexislatura.
Sunak nomeou pouco despois aos seus substitutos, que son Luke Hall en lugar de Halfon e Leo Docherty no posto de Heappey.
O líder 'tory' tamén designou a Nus Ghani como secretaria de Estado para Europa no ministerio de Exteriores e a Kevin Hollinrake como secretario de Estado na carteira de Empresa.
Aínda que as dimisións non suscitaron controversia, segundo a prensa Heappey estaba descontento polo insuficiente orzamento destinado ao Exército e, supostamente, por que non se lle ofreceu a carteira de Defensa nunha anterior remodelación ministerial.
Estas dúas renuncias súmanse a outra sesentena de deputados da formación gobernante que indicaron que non concorrerán nos próximos comicios.
Esta desbandada nas filas conservadoras prodúcese nun momento en que o Partido Conservador, no poder desde 2010, cae nas enquisas, que dan como favorito a gobernar o Reino Unido ao Partido Laborista de Keir Starmer.
Segundo unha media das sondaxes do últimos dez días, os laboristas gañarían cun 43,9% do voto, fronte a un 23,6 % dos tories, un 12,1 % de Reform (antigo Partido do Brexit, populista e antiinmigración), un 9,8 % dos liberaldemócratas e un 5,9 % dos verdes.