Dimite o ministro de Defensa británico ao non lograr incrementar o gasto militar

O ministro de Defensa británico, John Healey, presentou este xoves a súa dimisión, unha decisión que colleu a todo o mundo por sorpresa.

Healey fixo pública unha carta ao primeiro ministro Keir Starmer argumentando que "non tiña outra opción" polos desacordos entre ambos os con respecto ao Plan de Investimento de Defensa e ao que considera escaso financiamento.

O xa exministro, de 66 anos, sinala na súa carta que lamenta que Starmer fose "incapaz de dedicar os recursos que a nación necesita para defender o país en tempos de ameazas crecentes".

Healey detalla que o pasado luns recibiu o informe sobre o plan de investimento, que levaba esperando un ano, e ao lelo viu que queda por baixo do que se necesita xa que pospón ata 2030 unha inxección financeira cando "o imperativo é acelerar a nosa capacidade de batalla nos primeiros dous anos".

As demandas de financiamento de Healey eran dificilmente asumibles para Starmer, que enfronta un déficit público do 4,3 %, o nivel máis alto desde a pandemia do coronavirus, cunha ministra de Finanzas centrada precisamente en limitar o gasto público británico.

De feito, na súa carta, Healey quéixase da influencia que o departamento de Finanzas tivo para impedir unha mellora do financiamento para Defensa.

Un aumento do financiamento do sector da defensa é, por outra banda, un requisito da Alianza Atlántica aplicable a todos os seus membros, demanda que é apoiada de forma agresiva polo presidente dos Estados Unidos, Donald Trump.

A dimisión de Healey abre unha nova fronte ao xa debilitado Goberno de Keir Starmer, que fai menos dun mes perdeu a outro ministro, o titular de Sanidade, Wes Streeting, quen declarou pouco despois que aspiraba a disputar o liderado do Partido Laborista ao propio Starmer.