Dezaseis detidos, dous en Galicia, por distribuír miles de arquivos de pornografía infantil
Dous dos arrestados, un deles de Lugo, ingresaron en prisión
O material comisado contiña graves agresións sexuais a menores de idade
Arquivo/Policía Nacional
A Policía Nacional detivo 16 persoas e investiga outras 5 por posesión e distribución de pornografía infantil. Foi nunha operación desenvolvida en doce provincias españolas, entre elas, Lugo e Pontevedra. A policía interveu miles de arquivos de imaxe e vídeo que contiñan graves agresións sexuais a menores de idade.
Entre os arrestados destacan un profesor de secundaria en Barcelona e o presunto responsable da distribución de máis de 85.000 arquivos de menores, un veciño de Xirona que fotografaba as vítimas desde o seu domicilio cando estaban no patio do colexio.
Dous dos detidos, interceptados en Cáceres e Lugo, ingresaron xa en prisión provisional. Hai ademais cinco persoas investigadas en Madrid, Navarra e Valladolid.
A investigación efectuouse en colaboración con corpos policiais internacionais. As pescudas comezaron cando os axentes da Unidade Central de Ciberdelincuencia detectaron o intercambio de material ilícito entre distintas persoas a través de redes Peer To Peer (P2P).
A Policía Nacional chama á colaboración cidadá para a posible identificación de máis persoas implicadas nestes feitos, e insta a que todo aquel que teña información sobre a existencia da difusión, tenencia e almacenamento de pornografía infantil comuníqueo, de forma totalmente anónima e confidencial.
