Detidos dous exempregados de Pepe Vieira por roubarlle 9.000 euros e viño exclusivo
Foi o propio cociñeiro quen denunciou na Garda Civil a subtracción de cartos e de 50 botellas de viño do restaurante
O restaurante con dúas estrelas Michelín ten no soto unha adega con viños de moito valor económico e sentimental
A redada da Garda Civil deste martes en Pontevedra saldouse con dous detidos imputados por roubo. Agora sabemos que foran traballadores do restaurante Pepe Vieira. Foi o cociñeiro con dúas estrelas Michelin quen denunciou os feitos o pasado mes de marzo.
"Foron aproximadamente uns 10.000 euros en cartos e o valor do viño, pois aproximadamente sobre uns 45.000 euros máis ou menos", explica Xosé Torres Cannas, propietario e cociñeiro do Pepe Vieira
Polas características do roubo, sospeitaban que estaba involucrado alguén de dentro, porque non estaban forzadas nin a caixa forte, nin as rexistradoras, nin tampouco os accesos ao restaurante. Pero cometeron un erro, deixaron pistas no camiño, un billete de cen euros que atopou tirado outra das empregadas e que foi o fío do que tiraron para descubrir o roubo.
"Démonos conta enseguida que sabían onde estaban as cousas, por onde tiñan que entrar, a onde tiñan que ir", continúa
Todos os traballadores estaban no punto de mira. O círculo foise estreitando despois de analizar os sinais dos móbiles e as cámaras de vixilancia dun colexio próximo que situaban os detidos no lugar o día dos feitos. Un deles era persoa de confianza. Agora están en liberdade con cargos á espera de xuízo. Unha pequena parte do subtraído xa foi recuperado. Pero falta a de máis valor non só económico, senón tamén sentimental. O cociñeiro agradece as mostras de solidariedade de compañeiros e provedores que lles están facendo chegar novas botellas.
"Estas mostras de cariño a verdade é que me están reconfortando moitísimo, a verdade é que me sinto moi agradecido", recoñece o cociñeiro
