Detidos os presuntos responsables de roubos en 38 residencias da terceira idade

Unha investigación iniciada a consecuencia de varios roubos en residencias da terceira idade da provincia de Lugo en novembro do ano pasado levou á detención en Madrid de dous cidadáns romaneses. A Garda Civil acúsaos de asaltar ata 38 residencias en toda España e xa se decretou o seu ingreso en prisión. 

Os roubos nas residencias de Quiroga, Guntín e Ferreira do Valadouro son os que deron a primeira alerta para abrir a investigación. Segundo o seguimento que se lles fixo a instancias da Garda Civil de Lugo e do xulgado de Monforte, repetiron o seu modus operandi por toda España. 
Buscaban residencias que estiveran en poboacións pequenas, estudaban ben as instalacións para saber onde estaba a caixa forte onde se gardan os obxectos de valor dos residentes, que adoita ser nos despachos da dirección, e logo entraban de noite, despois de provocar un corte de luz na iluminación da zona. 

Comisáronlles máis de 24.000 euros, ademais de aparellos informáticos, inhibidores de frecuencia e cinco vehículos. Os dous homes detidos, de 33 e 42 anos, xa estaban en busca e captura en Romanía e Alemaña. En España a Garda Civil atribúelles polo menos 38 delitos de roubo en residencias no último ano e estima o botín acadado nuns 200.000 euros.