Detido un home por un incendio forestal causado mentres rozaba en Becerreá
Segundo a Garda Civil, o arrestado é un operario que traballaba sen contrato na limpeza de terreos
A investigación determinou que o incendio foi provocado polas faíscas orixinadas nas pedras pola maquinaria rozando
O incendio foi o 18 de setembro e afectou 13 hectáreas
A Garda Civil detivo este martes un home de 48 anos, de nacionalidade portuguesa, como presunto autor dun incendio forestal por unha "imprudencia" mentres rozaba en Becerreá o pasado 18 de setembro.
Segundo informa a Garda Civil nun comunicado, este home era un traballador sen contrato que realiza traballos de limpeza e roza nas marxes dunha estrada na parroquia de Vilachá.
"Levaba traballando sen contrato laboral varios meses, tendo constancia fidedigna o propietario da empresa da devandita vicisitude, xa que era o mesmo que lle pagaba a final de mes en efectivo e sen ningún tipo de xustificante oficial", explica a Garda Civil.
Os axentes observaron que na zona na que se iniciou o incendio fora rozada ese mesmo día, polo que se identificou nas inmediacións a dous traballadores dunha empresa de rozas, un dos cales era o condutor dun tractor coa rozadoira axustada, o cal tentou abandonar o lugar ante a presenza da patrulla.
A investigación determinou que o incendio foi provocado polas faíscas orixinadas nas pedras pola maquinaria rozando as marxes da estrada que se dirixe a Bustelo.
As dilixencias policiais foron remitidas á Autoridade Xudicial. O home foi detido pola Garda Civil, está acusado de ser o autor dun delito de incendio forestal por imprudencia. Este incendio afectou a unhas 13 hectáreas de monte raso e arboreda. Participaron medios terrestres e aéreos para a súa extinción.
