O Tribunal Superior denega a suspensión da taxa turística de Santiago que entra en vigor este mércores

A recarga do imposto sobre as estancias turísticas, a coñecida como taxa turística, entrará en vigor en Santiago de Compostela mañá mércores despois de que o Tribunal Superior de Xustiza de Galicia denegase as medidas cautelares contra a súa activación demandadas pola Unión Hostaleira de Compostela.

Así o confirmou este martes o máximo tribunal galego nun comunicado remitido a medios minutos despois de que o Concello compostelán adiantase esta decisión. A sección segunda da Sala do contencioso-administrativo do TSXG denegou a suspensión cautelar porque considera que este non é "o momento procesual en que se deba analizar o fondo da cuestión, nin de prexulgar a validez ou invalidez da regulación impugnada".

Os maxistrados, tras ponderar os intereses en conflito, conclúen na resolución que "non se evidencia que sexa de superior rango o interese sostido pola asociación recorrente en evitar a aplicación do tributo que o interese público inherente aos investimentos e gastos aos que o importe recadado afecta e a finalidade extrafiscal fixada pola disposición legal que o crea".

Ademais, sinalan que "o mero feito de que entre en vigor a disposición" non implica a perda da finalidade lexítima do recurso presentado pola asociación para que o TSXG xulgue se a taxa turística “é ou non conforme a dereito".

Do mesmo xeito, o tribunal indica que para suspender a aplicación da recarga de forma cautelar débese especificar "de que forma afecta á esfera xurídica ou patrimonial do recorrente a aplicación da devandita disposición durante o tempo que poida durar a tramitación e resolución do procedemento" para, desta forma, "valorar se unha eventual sentenza estimatoria puidese perder o seu efecto útil".

Neste caso, a Sala subliña que "non hai un prexuízo económico inmediato e evidente para a recorrente polo feito da entrada en vigor dunha disposición que non establece un gravame económico directo e inmediato para o colectivo representado pola asociación, que non é a obrigada ao pago do tributo, senón que o serán os clientes dos establecementos".

Por último, os maxistrados conclúen no auto que non aprecian que a aplicación da disposición, polo tempo que dure a tramitación do procedemento, "poida orixinar prexuízos irreparables ou de difícil reparación para a asociación recorrente ou os establecementos por ela representados".

Este mesmo martes, a alcaldesa de Santiago, Goretti Sanmartín, defendera a entrada en vigor desta ordenanza que grava as estancias turísticas ao entender que "non existe criterio que faga suspender ese imposto". Polo tanto, "o proceso segue adiante" e desde este mércores empézase a aplicar a taxa turística, de entre 1 e 2,5 euros, en función da categoría da hospedaxe.