José Manuel Durán, o Chioleiro, detido como presunto autor do crime da maleta

A Policía Nacional detivo na mañá deste venres un home, condenado previamente por dúas mortes, como suposto autor do crime da maleta, que apareceu a semana pasada cun cadáver dentro tirada na rúa Espedrigada, en Vigo.

Fontes coñecedoras das actuacións confirmaron que o detido é José Manuel Durán, coñecido como o Chioleiro, que saíu de prisión fai agora un ano tras cumprir unha condena de 17 anos e medio de cárcere pola morte da súa veciña. Ademais, o home xa estivera antes en prisión por agredir sexualmente e matar a súa avoa no ano 1988.

Á súa saída do cárcere, en febreiro de 2023, regresou á localidade pontevedresa da Lama, poñendo en alerta os veciños, xa que supoñía quebrantar a orde que lle impedía achegarse aos familiares da súa última vítima. Por iso tamén foi detido e posteriormente posto en liberdade.

José Manuel Durán, "O Chioleiro", en 2004

O detido e a vítima conviviran, presuntamente, nunha pensión en Vigo

Todo iso despois de que esta semana a policía buscara un home que conviviu cunha muller nun piso de alugueiro por habitacións en Vigo, situado a escasos metros de onde apareceu o corpo.

Segundo as mesmas fontes, o Chioleiro alugaría un cuarto dentro deste inmoble para vivir coa súa parella. El deixaría o cuarto no mes de setembro, mentres que a ela, duns 60 anos e de nacionalidade española, xa se lle perdeu a pista meses antes. Por iso, os axentes realizaron un rexistro do devandito piso, situado á altura do número 83 da rúa Fragoso de Vigo.

Nese rexistro atopáronse indicios nun colchón que poderían evidenciar que alí ocorrería un feito violento. A partir de aí comezou a procura para tratar de localizar o paradoiro do home que arrendou o cuarto xunto á muller, cuxas características serían compatibles co corpo achado na maleta.

Por outra banda, a policía continúa coas xestións para tratar de identificar o cadáver a través de varios métodos, tanto polo seu ADN como pola reconstrución das pegadas, xa que foi atopado en avanzado estado de descomposición. 

O achado do cadáver

A investigación comezou despois de que o cadáver dunha muller aparecese dentro dunha maleta o pasado 24 de febreiro en Vigo. A maleta foi achada por un repartidor na tarde do xoves, nun predio cheo de maleza, e moi preto dunha vivenda, na rúa Espedrigada.

Ao decatarse do mal cheiro, o traballador avisou a Emerxencias e a Policía Nacional comprobou que, no interior da maleta (que estaba envolta por plástico similar ao que se usa para embalar as equipaxes nos aeroportos), había un corpo de muller.

O cadáver atopábase en moi mal estado debido á descomposición e os investigadores cren, ao ver as condicións do corpo e atendendo ao testemuño da veciña da vivenda próxima, que a maleta estivo alí polo menos desde o pasado mes de agosto. A autopsia realizada ao cadáver evidenciou que recibiu unha puñalada mortal, o que confirma a morte homicida da vítima.