Detido un home como autor de tres roubos en Camariñas e Vimianzo
O detido empregaba un pasamontañas e un coitelo para esixir de forma intimidatoria a recadación
A Garda Civil de Carballo detivo a un home de 63 anos como presunto autor dun delito de roubo con forza nas cousas e dous delitos de roubo con violencia e intimidación en establecementos comerciais de Vimianzo e Camariñas.
A investigación policial deu comezo por mor das denuncias presentadas polos prexudicados, despois de que ocorrera o primeiro dos roubos o 20 de maio nun establecemento de hostalería situado en Ponte do Porto, Camariñas. O presunto autor subtraeu varias botellas de bebidas alcohólicas e uns 500 euros da caixa.
Na tarde do 30 de maio, asaltou dous locais no municipio de Vimianzo, empregando un pasamontañas para ocultar a súa identidade.
.png)
Imaxe cedida pola Garda Civil
Sobre as 20.00 horas irrompeu nunha tenda de alimentación utilizando un coitelo para esixir de forma intimidatoria a recadación. Media hora despois, accedeu a unha farmacia da mesma localidade cun coitelo e subtraeu uns 400 euros en efectivo.
No operativo para a súa detención colaboraron a Garda Civil de Vimianzo e Camariñas. O pasado 2 de xuño finalizou coa detención do sospeitoso en Camelle, tras poñelo ao dispor do Tribunal de Instancia de Guardia de Corcubión.
.png)
Imaxe cedida pola Garda Civil
