Detido un traballador dun centro comercial de Lugo por usar datos de clientes para compras e apostas

Axentes do Corpo Nacional de Policía detiveron en Lugo un empregado dun coñecido centro comercial da cidade como suposto autor dun delito continuado de estafa, dado que é sospeitoso de contratar créditos a nome de polo menos 27 persoas sen o seu consentimento.

Segundo informou a Comisaría Provincial de Lugo nun comunicado, a investigación comezou tras a denuncia de dous clientes, que descubriron a existencia de créditos ao seu nome que non solicitaran.

Esas denuncias motivaron o inicio das pescudas e os axentes encargados do caso comprobaron que "o mesmo procedemento repetíase con outros prexudicados".

A investigación foi avanzando e foron identificadas no proceso numerosas solicitudes de financiamento tramitadas entre xuño e setembro, todas elas realizadas supostamente con datos persoais de clientes sen o seu consentimento. O número de vítimas desta práctica ascende polo menos a 27 persoas.

Os investigadores identificaron o suposto autor destas estafas, localizárono e procederon á súa detención. Foi realizado tamén un rexistro no domicilio do detido, no que se recuperaron varios obxectos adquiridos por mediante as operacións de financiamento fraudulentas.

O autor da estafa destinaría parte do diñeiro obtido a compras persoais dentro do propio centro comercial onde traballaba, tras xerarlles tarxetas de crédito aos clientes, e tamén faría uso de plataformas de xogo en liña para realizar apostas, sinala a Policía Nacional.

O detido foi posto á disposición do Xulgado de Garda de Lugo.