Deteñen tres veciños de Noia como presuntos autores de oito delitos de roubo

As forzas de seguridade desenvolveron varias actuacións de vixilancia dentro da segunda fase da operación Letimovil. Grazas a elas lograron sorprender unha das persoas da banda cando estaba a roubar nun salón de peiteado de Noia. 

 "A inmediatez coa que se actúa nese momento dá lugar a que se poida deter na allada unha das compoñentes do grupo, unha muller", conta Diego Rico, xefe do Equipo de Policía Xudicial de Noia.

A súa detención, xunto á información que recolleron durante as investigacións, permitiu realizar os tres arrestos.

"Tiñamos 22 roubos que se cometeron neste último mes. Podemos relacionalos plenamente con oito deles e estamos intentando ver en cantos máis podemos demostrar a súa implicación nos roubos que se cometeron".

Tras a detención dos supostos autores dos roubos, as forzas de seguridade realizaron os rexistros de tres domicilios da localidade. Alí atoparon parte do material roubado e unha importante cantidade de diñeiro. Agora, tras esta operación, mandan unha mensaxe de tranquilidade á poboación.

 "Cremos que con estas detencións é posible que paren un pouco os roubos".

Os detidos pasaron a disposición xudicial e un deles ingresou en prisión. Na primeira fase da operación xa arrestaran seis persoas como presuntas autoras dun total de 21 delitos de roubo na Barbanza.