Deteñen en Lugo un home por acoitelar o seu sobriño tras discutir sobre a colocación dunha bombona
Os feitos producíronse arredor das 20:45 horas, cando a Sala 092 recibiu unha chamada de urxencia alertando de que un home acababa de causar lesións cun coitelo a un familiar directo
Segundo manifestou a propia vítima, a agresión produciuse tras unha discusión familiar iniciada polo cambio dunha bombona de butano, no transcurso da cal o seu tío lle propinou un primeiro corte na coxa e outro no antebrazo cando tentaba protexerse do ataque dirixido ao pescozo
Axentes da Policía Local de Lugo detiveron na tarde do luns un home de 68 anos como presunto autor dun delito de tentativa de homicidio, tras agredir o seu sobriño cunha arma branca no domicilio familiar do barrio de Santa María de Bóveda.
Os feitos producíronse arredor das 20:45 horas, cando a Sala 092 recibiu unha chamada de urxencia alertando de que un home acababa de causar lesións cun coitelo a un familiar directo. Ao lugar desprazáronse varios indicativos de Policía Local, que atoparon á vítima, un home de 36 anos, cunha hemorraxia evidente e lesións incisas na perna e o brazo esquerdo.
Segundo manifestou a propia vítima, a agresión produciuse tras unha discusión familiar iniciada polo cambio dunha bombona de butano, no transcurso da cal o seu tío propinoulle un primeiro corte na coxa e outro no antebrazo cando tentaba protexerse do ataque dirixido ao pescozo.
Mentres unha patrulla prestaba asistencia inmediata á vítima e solicitaba atención sanitaria urxente, concretamente, unha axente do corpo da Policía Local aplicou adecuadamente e de inmediato os primeiros auxilios de forma eficaz e decisiva. A súa rápida actuación permitiu conter a hemorraxia derivada das lesións por arma branca, contribuíndo de forma directa a salvagardar a integridade física do ferido fronte a gravidade das feridas sufridas.
Outro grupo de axentes accedía ao interior do domicilio, localizando ao presunto agresor sentado fronte a un computador, en actitude aparentemente indiferente. Foi inmediatamente reducido e detido como presunto autor dun delito de tentativa de homicidio, procedéndose ao seu traslado a dependencias policiais.
Durante o traxecto, o detido comezou a presentar síntomas de desmaio e perda de consciencia, polo que foi atendido por persoal sanitario da ambulancia desprazada ao lugar. Por indicación facultativa, foi trasladado de urxencia ao Hospital Universitario Lucus Augusti, onde quedou ingresado baixo custodia policial.
Pola súa banda, a vítima foi trasladada tamén ao HULA nunha ambulancia medicalizada, onde recibiu atención sanitaria inmediata, o agresor atópase pendente de evolución médica e será posto á disposición xudicial en canto lle dean a alta.
