Desmantelan unha plantación de marihuana en Mos grazas ao cheiro
No xardín da vivenda, había nove plantas moi altas, con 257 follas cargadas de gromos e outros sete quilos listos para vender
É a segunda operación contra o cultivo de marihuana en menos de dez días na provincia de Pontevedra
O olfacto dos veciños foi clave. As nove plantas eran altas, de entre metro e medio e dous de altura, con 257 ramas cargadas de gromos de marihuana. Estaban no xardín dunha vivenda de Mos, de maneira que pasaran desapercibidas, pero foi imposible disimular o cheiro.
Tras a alerta cidadá, a Garda Civil vixiou a casa durante meses ata conseguir a orde de rexistro. Ademais da plantación, atoparon sete quilos de gromos listos para vender no mercado negro.
O propietario, que supostamente estaba de alugueiro e que levaría pouco tempo vivindo na zona, é un home de 51 anos, que quedou en liberdade con cargos.
A operación de Mos é a segunda en dez días na provincia de Pontevedra contra o cultivo de marihuana. A primeiros de mes, a Policía Local de Poio desmantelou outra plantación extensiva con ducias de plantas. Curiosamente, tamén grazas ao cheiro que saía da propiedade. Comisaron algo máis de 50 quilos de droga.
