Desmantelan no sur de España seis fábricas ilegais de tabaco e comisan máis de 20 millóns de cigarros
Desmantelan no sur de España seis fábricas ilegais de tabaco e comisan máis de 20 millóns de cigarros
No operativo detivéronse 50 persoas
As dúas organizacións responsables da fabricación e distribución estaban asentadas en España, pero comercializaban o tabaco en distintos países da UE
A Garda Civil detivo 50 persoas en 23 rexistros de domicilios, inmobles e naves industriais en Alacante, Cuenca, Huelva, Murcia, Sevilla e Toledo nunha operación internacional na que foron desmanteladas seis fábricas ilegais con máis de 20 millóns de cigarros e 38,4 toneladas de picadura e folla de tabaco.
O valor de todo o material intervido supera os 10 millóns de euros e calcúlase que as fábricas tiñan unha produción diaria de ata 7.800.000 cigarros, informa este xoves a Garda Civil.
A operación, en colaboración con axencias e corpos policiais europeos, permitiu desarticular dúas redes criminais de carácter internacional asentadas en España que se dedicaban á produción de tabaco de contrabando que despois distribuían e comercializaban noutros países europeos.
As organizacións xestionaban catro instalacións de produción activas e dúas inactivas que falsificaban marcas de tabaco recoñecidas comercialmente.
Entre os detidos están dous individuos fuxidos da Xustiza polaca que foron postos ao dispor dos tribunais dese país.
A investigación comezou hai sete anos ao recibir información desde Europol, Polonia e Lituania sobre a posible existencia de grupos criminais con actuación en distintos países da Unión Europea, centrada especialmente nun cidadán polaco, itinerante en España e dedicado a esas actividades desde 2016.
As pescudas evidenciaron unha actividade delituosa con maior grao de complexidade e alcance do inicialmente previsto e permitiron detectar dúas posibles organizacións criminais cunha ampla presenza en distintos puntos do territorio español.
Localizáronse posibles centros clandestinos de produción de cigarros que articulaban unha rede de distribución que daba servizo non só aos grupos investigados, senón a terceiras organizacións con ramificacións no sur peninsular, Portugal e Francia, sen descartar o Reino Unido.
As instalacións desmanteladas incluían os procesos de fabricación, empaquetado e almacenamento do tabaco e dispoñían de varias zonas habilitadas como espazo de residencia para os traballadores, onde estes permanecían aloxados de xeito permanente, algúns deles en condicións precarias, aglomerados en estancias preparadas nas propias fábricas.
Así mesmo, incautáronse de 18 vehículos, numerosos dispositivos electrónicos encriptados, 170.000 euros en efectivo e armas de fogo.
Estas dúas operacións foron dirixidas pola Sección de Instancia e Instrución do Tribunal de Instancia número 2 de Tarancón (Cuenca) e a Sección de Instrución do Tribunal de Instancia número 5 de Elx (Alacante), respectivamente, coordinadas coa Fiscalía.
As investigacións continúan abertas e non se descartan máis actuacións. Sete dos investigados están xa en prisión provisional.
A Garda Civil destaca na súa comunicación a cooperación policial internacional, coa participación de Europol e a Oficina Europea de Loita Contra a Fraude (OLAF), a Policía Central de Investigacións de Polonia e a Xendarmería Nacional Republicana de Portugal, e tamén o Servizo de Investigación Criminal de Aduanas de Lituania.
