Desarticulada unha banda en Arteixo que asaltaba chalés na provincia da Coruña

O Equipo de Patrimonio da Unidade Orgánica de Policía Xudicial da Comandancia da Coruña desarticulou en Arteixo un grupo criminal que se dedicaba a asaltar e roubar vivendas na Coruña. 

A investigación iniciouse a partir da análise de información e a vixilancia sobre os roubos con forza en domicilios cometidos na comunidade. Os axentes identificaron preto de Arteixo a un grupo de estranxeiros, posiblemente do leste de Europa, que se movían por toda a provincia e aproveitaban a ausencia dos propietarios durante festividades como a Semana Santa para cometer os roubos.

Os asaltos cometéronse principalmente en chalés ou casas unifamiliares illadas. Os investigadores atribúenlles ata trece roubos nas localidades de Laracha, Bergondo, Carral e Culleredo.

Durante a investigación localizouse o agocho onde o grupo almacenaba os obxectos roubados, e recuperaron numerosas xoias, bixutería e outros obxectos de valor.

Os tres detidos ingresaron xa en prisión

Ante a evidencia de que planeaban abandonar a provincia, coordinouse un operativo con diversas unidades para a súa detención. Un foi capturado pola Sección de Fiscal e Fronteiras da Garda Civil, cando tentaba fuxir cara ao sur de España nun voo procedente desde o Aeroporto de Alvedro.

As outras detencións realizáronse na vía pública, en operacións coordinadas entre a USECIC (Unidade de Seguridade Cidadá de Comandancia) da Coruña e o Equipo de Patrimonio de Policía Xudicial.

Nos rexistros recuperáronse obxectos valiosos roubados, incluídos reloxos de alta gama e xoias, principalmente de ouro, que foron devoltos aos seus donos. Tamén se acharon ferramentas utilizadas para entrar nas vivendas, como chaves de parafusos e utensilios punzantes.

Os tres arrestados, de entre 38 e 48 anos, foron postos á disposición do Xulgado de Instrución Nº 8 da Coruña, que ordenou o seu ingreso en prisión provisional sen fianza.