Desartellado un punto de venda de drogas en Santiago con dous detidos
Desartellado un punto de venda de drogas en Santiago con dous detidos
Comisados 80 gramos de cocaína e 45.000 euros
A detección foi posible grazas á colaboración da veciñanza
"Víase moito movemento de xente rara, drogadicta que andaba trapicheando", confesa un veciño.
A preocupación dos veciños da rúa dos Pelamios, en Santiago de Compostela, era manifesta. Levaban tempo observando movementos estraños.
"Si, daba moi mal aspecto aos negocios e a toda a zona, a verdade é que estaba perdendo moito valor a zona por este movemento de xente....".
"Eles fan e desfán o que lles dá a gana, se teñen que facer mal, tamén o fan e respecto non hai moito, porque eles marchan de aquí unha temporada e volven outra vez, por que? Porque aquí fan o que queren?", contan varios veciños.
Tamén era habitual ver tirados na vía pública todo tipo de obxectos que habitualmente se usan para o consumo de drogas.
"Tiraban as cousas pola fiestra e quedaban aí, si, iso téñoo visto eu pola mañá", apunta unha muller.
Grazas á colaboración da veciñanza, a Policía Nacional puido identificar e desartellar un deses piso ocupados ilegalmente que funcionaba como punto de venda de cocaína e heroína. Na operacion detiveron dúas persoas.
"Procederon á detección de dúas persoas pola súa presunta participación nun delito de tráfico de drogas e neste caso grazas á colaboración cidadá que informou de un trasego inusual de consumidores habituais de substancias estupefacientes e concretamente na zona da rúa Os Pelamios o que xerara unha grande alarma social", informa César Ramos, voceiro da Policía Nacional de Santiago.
No piso ocupado de forma ilícita atoparon un machete de grandes dimensións, droga e tamén cartos en efectivo.
"Realízanse dúas entradas e rexistros en varios domicilios e froito das cales procedeuse ao comiso de 45.000 euros, 80 gramos de cocaína e varias básculas de precisión, así como útiles e precursores destinados á elaboración e ao tráfico de substancias estupefacientes", continúa o policía.
Estas dúas detencións súmanse a outras 3, tamén realizadas nas últimas semanas, en varios operativos contra o tráfico de drogas en Santiago.