Atopan un sobrevivente no sinistro do avión de Air India, que viaxaba con 242 persoas
O avión bateu contra o comedor dunha residencia de estudantes
O Goberno da India abriu unha investigación urxente para determinar que sucedeu
O Goberno da India confirmou que só se localizou un único sobrevivente entre as 242 persoas que viaxaban a bordo do voo AI-171 de Air India que se estrelou na cidade de Ahmedabad .
Atribuíu a causa do accidente a un incendio con temperaturas extremas que fixo imposible o rescate.
"O avión transportaba case 125.000 litros de combustible e, debido á alta temperatura, non había posibilidade de salvar a ninguén", afirmou nunha comparecencia o ministro do Interior, Amit Shah.
Amit Shah confirmou que a bordo da aeronave viaxaban 230 pasaxeiros e 12 tripulantes e que se localizou un único sobrevivente.
Os medios indios identificaron o sobrevivente como Ramesh Vishwakumar, un cidadán británico de 38 anos, que segundo as autoridades ocupaba o asento 11A cando o Boeing 787 Dreamliner se estrelou contra un complexo residencial.
A catástrofe aérea estendeuse a terra firme cando o avión impactou contra o comedor dunha residencia de estudantes. As cinco vítimas mortais confirmadas ata o de agora eran catro estudantes e un médico residente que se atopaban no edificio á hora do xantar.
O balance definitivo de vítimas coñecerase unicamente tras a identificación mediante probas de ADN, indicou.
"Están a recollerse mostras dos cadáveres e dos familiares, mesmo no estranxeiro. Realizaranse ao redor de 1.000 probas", indicou Shah.
Engadiu que a recuperación dos corpos está practicamente finalizada e que serán entregados ás familias unha vez concluído o proceso.
O ministro explicou que o Executivo central foi alertado aos dez minutos do accidente, ocorrido no oeste do país, e que o primeiro ministro Narendra Modi contactou de inmediato coas autoridades rexionais para activar unha resposta coordinada.
En canto ás causas do sinistro, o Goberno anunciou o inicio dunha investigación urxente.
O director executivo de Air India, Campbell Wilson, pediu evitar as especulacións e asegurou que a aeroliña compartirá unicamente información precisa e oportuna.
