Taxistas de Vigo recollen os maiores das residencias para que poidan ver as luces do Nadal

En Vigo os maiores que viven en residencias non quedaron sen a súa tradicional visita ás luces de Nadal. Os taxistas que participan nesta iniciativa recolléronos nos seus centros e trasladáronos ata o centro da cidade.

Unha actividade que lles permite a estes maiores saír da rutina e participar do lecer da súa contorna.

Como veñen facendo dende hai oito anos, os taxistas vigueses recolleron os maiores nas residencias onde viven habitualmente.

"Facemos un acto de solidariedade.Traémolos ata a Porta do Sol, onde está a árbore e os distintos adornos e despois levámolos de volta ata as súas residencias." conta Víctor García, taxista de Vigo.  

Estaba previsto que fose en decembro, pero o mal tempo obrigou a suspender unha visita que desta vez non parou nin a chuvia.

"Saír da súa rutina diaria, poder prepararse, de estar días pensando en que roupa se van poñer, se van ao salón de peiteado, que se vou ver as luces...a verdade é que é un día moi ilusionante para eles", di  Nerea Gómez Cameselle, terapeuta ocupacional de Doral Residencias. 

O domingo remata oficialmente o Nadal vigués, porén as luces non podían apagarse sen recibir estes maiores que contaxian ilusión