Nove feridos, dous deles graves, no incendio dun cuarto dunha residencia de Monforte
Unha das hipóteses coa que traballan os investigadores é que o lume o provocara un cigarro mal apagado
Todos os residentes tiveron que ser evacuados mentres se realizaron as tarefas de extinción e ventilación
A policía investiga as causas do incendio na residencia de maiores DomusVI de Monforte. Hai dous feridos graves, dous residentes que tiveron que ser trasladados á unidade de queimados do Chuac.
Ao parecer trátase dos dous usuarios que estaban na habitación en que empezou o lume, e que quedaron atrapados entre as lapas. Ambos teñen queimaduras no corpo e foron trasladados á Coruña, onde permanecen con prognóstico reservado.
Houbo que atender ademais outras sete persoas por inhalación de fume, tres residentes e catro profesionais do centro, pero todos foron xa dados de alta. En total foron nove feridos nun incendio que está investigando a Policía Nacional, que estivo aquí recollendo pegadas.
Unha das hipóteses coas que traballa é que o lume o provocara un cigarro mal apagado. A esta hora a residencia funciona con normalidade. Os bombeiros refrescaron e ventilaron durante a tarde toda a primeira planta que, de momento, permanece baleira.
Segundo a información do 112 Galicia, o suceso produciuse minutos despois das 08:00 horas deste martes cando un traballador alertou de que saía fume dunha dos cuartos da primeira planta. Ademais, indicou que sacaron aos ocupantes da estancia e necesitaban asistencia sanitaria.
Os bombeiros atallaron rapidamente as lapas e procederon a ventilar as instalacións. Todos os residentes tiveron que ser evacuados mentres se realizaron as tarefas de extinción e ventilación.
No operativo tamén participaron os profesionais de Urxencias Sanitarias de Galicia-061 e axentes da Policía Nacional e Local.
As causas do incendio están a ser analizadas e a situación xa está controlada. Ante isto, as mesmas fontes indican que os sistemas de seguridade e protocolos do centro activáronse "correctamente" e a residencia mantén a súa actividade con normalidade.
"Estamos a seguir de cerca a situación e colaborando en todo momento cos servizos de emerxencia e autoridades", detallaron fontes de DomusVi.
O incendio foi na mesma residencia que leva meses sufrindo un gromo de sarna que afecta a máis de 20 persoas. Agora, traballan para que os 167 usuarios volvan o antes posible á normalidade.
