Desaloxan un céntrico edificio en Vigo a causa dun incendio
O lume iniciouse tras estoupar un contador que estaba sendo manipulado por un técnico
Varios veciños dun edificio situado no número 16 de Travesía de Vigo foron desaloxados polos bombeiros este martes á mañá por mor dun incendio.
Os feitos tiveron lugar sobre as 8:40 da mañá, momento en que varios veciños chamaron ao 112 Galicia para informar de que estourara o contador da luz, que estaba a ser manipulado polo técnico, o cal cortara previamente a luz.
Aínda que informaban de que todos os veciños estaban ben, afirmaban tamén que había moito fume nas zonas comúns do edificio.
Ao lugar dirixíronse inmediatamente os Bombeiros de Vigo, e o 112 advertiu da situación tamén á Policía Local e á Policía Nacional, así como a Urxencias Sanitarias 061.
De momento descoñécese o alcance do incendio ou o número de persoas que puidesen resultar afectadas.
