Desaconsellan o baño nas praias de Rodas e Figueiras por contaminación da auga
Sanidade detectou contaminación microbiolóxica e recomenda non bañarse ata que se recupere a calidade da auga
Europa Press - Arquivo
A Consellería de Sanidade desaconsella temporalmente o baño nas praias de Rodas e Figueiras, nas illas Cíes, tras detectar contaminación microbiolóxica na auga.
Segundo informou o Concello de Vigo, as análises realizadas polo Laboratorio de Saúde Pública de Galicia confirmaron a presenza de bacterias nunha concentración incompatible coa recomendación do baño.
Ata que a calidade da auga volva ser apta, o Concello recomenda non bañarse nestes areais.
A situación lembra a rexistrada a pasada semana en Baiona, onde as praias da Ladeira e Santa Marta permaneceron pechadas durante varios días por contaminación das súas augas. Ambas reabriron o martes despois de recuperar a calidade excelente da auga.
