Derruban dúas narcochabolas nunha semana no barrio coruñés do Castrillón

Este venres derrubaron a segunda de varias chabolas do barrio coruñés do Castrillón que os veciños cualifican de conflitivas porque, segundo contan, nelas véndense e consómense drogas a calquera hora do día.

Denuncian amais que medrou a inseguridade nos últimos tempos. Unha situación que provocou unha maior vixilancia policial no barrio.

Precisamente, a Policía Nacional prendeu no barrio tres persoas que formaban un grupo criminal dedicado á venda de substancias estupefacientes. Na operación, os axentes interviñeron cocaína, heroína e haxix, ademais dunha pistola, munición e un puño americano.