Dépor, Racing e Celta B rematan o 2021 cos obxectivos a tiro
A primeira federación volverá o vindeiro oito de xaneiro. Aínda quedan dúas xornadas da primeira volta e toda a segunda. Un mundo para tódolos equipos. Os tres galegos chegaron ao parón en boa situación. O Deportivo lidera a táboa con 37 puntos, catro máis que o segundo, o Rácing de Santander. Os de Borja Jiménez semellan estar no bó camiño para o ineludible obxectivo do ascenso ao fútbol profesional.
Entende o técnico deportivista que será difícil atopar no mercado invernal un bó reforzo para o ataque, aínda que por pedir...
No Rácing de Ferrol pensarán que o que é difícil mellorar é a defensa. Os de Cristóbal Parralo son os segundos menos goleados, con trece tantos en contra. Só o Deportivo é mellor nese aspecto, con nove. Esa firmeza atrás e as dúas vitorias consecutivas das dúas últimas xornadas levaron ao Rácing a unha quinta praza esperanzadora, con 28 puntos. Hai moita igualdade, pero estar no postos de privilexio quita presión e pode axudar cara o futuro.
O máis arriba posible tamén quere estar o Celta B. O equipo de Onésimo é o décimo clasificado, pero está a só tres puntos do quinto posto, agora ocupado polo Rácing, e que dá dereito a xogar o playoff de ascenso. Todo, malia a derrota da última xornada ante o Tudelano, o pechacancelas da táboa, e tamén ás características sempre especiais dos conxuntos filiais, que teñen que atender varias frontes.
Cada un cos seus propios condicionantes e as súas distintas esixencias. Pero os tres conxuntos galegos estás preparados para intentar acadar os obxectivos en 2022. Agardan uns meses de fortes emocións.
